பாலா வழங்கும் விருதுகள்....

நீ என்ன அவ்வளவு பெரிய ஆளா? என்று திட்டுவது கேட்கிறது. நம்ம ஞாநி பூச்செண்டு, குட்டு, சொட்டு என்று கொடுப்பாரே அது போல. கடந்த சில தினங்கள் நான் பார்த்த நாட்டு நடப்பு விஷயங்களை வைத்து எனக்கு பிடித்தவர்களுக்கு இந்த விருதுகளை கொடுக்கிறேன். இதில் ஆட்சேபம் இருந்தால் சரியான நபர்களை நீங்களே பரிந்துரை செய்யலாம். 

சிறந்த அமைதியாளர் விருது

தமிழக எதிர்கட்சி தலைவர் கேப்டன் அவர்களுக்கு வழங்கப்படுகிறது.  புயலே அடித்தாலும் நான் அமைதி மட்டுமே காப்பேன் என்பதில் உறுதியாக இருப்பதால் இந்த விருது வழங்கப்படுகிறது 

சிறந்த எஸ்கேப் ஆர்டிஸ்ட் விருது

இவரைத்தவிர இந்த விருதை பெற இன்னொருவர் பிறந்துதான் வரவேண்டும். அவர்தான் மாண்புமிகு தமிழக முதல்வர் அம்மா அவர்கள். சுப்ரீம் கோர்ட்டுக்கே அல்வா கொடுத்து வருவதால் இந்த விருது அளிக்கப்படுகிறது 

 

சிறந்த நகைச்சுவை நடிகர் விருது

இன்னுமா நம்மை இந்த ஊர் நம்புது என்று எந்த கவலையுமே இல்லாமல் அறிக்கைகளை விட்டுக்கொண்டிருக்கும் சு.சாமி அவர்களுக்கு இந்த விருது வழங்கப்படுகிறது. இதுவரை இதே விருதை இவர் நூறு தடவைக்கும் மேல் பெற்றிருப்பதால், இவருக்கு கூடிய விரைவில் வாழ்நாள் நகைச்சுவையாளர் விருது பெரும் வாய்ப்பு மிக அதிகம். 

சிறந்த குணசித்திர நடிகர் விருது

இந்த விருது அய்யப்பன் மற்றும் சக்ஸ்சேனா ஆகியோருக்கு பகிர்ந்தளிக்கப்படுகிறது. நீதிபதியே கண்கலங்கும்படியான ஒரு நடிப்பை வெளிப்படுத்தியதற்காக இந்த விருது வழங்கப்படுகிறது. கிளைமாக்ஸில் மயங்கி விழும் காட்சியில் தத்ரூபமாக நடித்ததற்கு நடுவர் குழுவே எழுந்து கை தட்டினர் என்பது குறிப்பிடத்தக்கது. 

 

சிறந்த வர்ணனையாளர் விருது

ஒவ்வொரு போட்டி முடிந்ததும், தாங்கள் எப்படி தோற்றோம் என்பதை விலாவாரியாக விவரிக்கும் கேப்டன் கூல் தோனிக்கு இந்த விருது வழங்கப்படுகிறது. மேலும் ஒவ்வொரு ஆட்டத்துக்கும் வெவ்வேறு வர்ணனைகளை பயன்படுத்துவது பாராட்டுக்குரியது. 

சிறந்த ஜேம்ஸ்பாண்ட் விருது 

உள்துறை அமைச்சர் சிதம்பரம் அவர்களுக்கு வழங்கப்படுகிறது. ஜேம்ஸ்பாண்ட் படங்களை விட அதிகமாக குண்டு வெடித்த பிறகும், ஜேம்ஸ்பாண்ட் மாதிரி மிக அசால்டாக புன்னகையை வெளிப்படுத்துவதால் இந்த விருது.

சிறந்த துப்பாக்கி சுடும் விருது 

தமிழக காவல் துறைக்கு இந்த விருது வழங்கப்படுகிறது. 

சிறந்த தலைமறைவாளர் விருது

வைகைப்புயல் வடிவேலு அவர்களுக்கு வழங்கப்படுகிறது. தேர்தல் முடிவுகள் வெளிவந்த நாளில் இருந்து இன்று வரை தான் எங்கிருக்கிறேன் என்று யாருக்கும் தெரியாமல் பாதுகாத்ததற்கு இந்த விருது வழங்கப்படுகிறது 

சிறந்த கதாசிரியர் விருது 

ஆதி திராவிடர் நலத்துறை அமைச்சர் சுப்பிரமணியன் அவர்களுக்கு வழங்கப்படுகிறது. பழைய கதையை, கலைஞர், கனிமொழி, ஸ்டாலின் உள்ளிட்ட புதிய கதாப்பாத்திரங்களோடு, அம்மா மனம் குளிரும் வண்ணம் ரீமேக் செய்ததற்காக இந்த விருது கொடுக்கப்படுகிறது 

சிறந்த பத்த வச்சுட்டியே பரட்ட விருது 

இது முன்னாள் முதல்வர் கலைஞருக்கும், ஜான் பாண்டியன் அவர்களுக்கும் பகிர்ந்தளிக்கப்படுகிறது. காரணம் சொல்ல தேவை இல்லை.  

சிறந்த விசுவாசி விருது

இதற்கு போட்டியே இல்லாமல் அன் அப்போஸ்டாக தேர்ந்தெடுக்கப்பட்டவர் பாரத பிரதமர் மன்மோஹன் சிங் 

சிறந்த எட்டப்பன் விருது

உள்ளே இருந்தபடி வரிசையாக பெயர்களை சொல்லி கிலி ஏற்படுத்திக்கொண்டிருக்கும் ராசாவுக்கு இந்த விருது ஏக மனதாக கொடுக்கப்படுகிறது. 

ஜெலூசில் வழங்கும் வயிற்றெரிச்சலுக்கான சிறப்பு விருது

இளையதளபதி ரசிகர்களுக்கு இந்த விருது பகிர்ந்தளிக்கப்படுகிறது. (அவர்களைப் பொறுத்தவரை) மொக்கை படமான மங்காத்தாவுக்கே இப்படி வயிறெரிந்து, பேதி ஆகும் நிலைக்கு வந்ததால் இந்த விருது .... 

புரட்சிக்கான சிறப்பு விருது

வினவு தோழர்களுக்கு வழங்கப்படுகிறது. நாட்டில் என்ன நடந்தாலும் அதில் (உயர்)சாதி பெயிண்ட் அடித்து, அதை ஏமாளியான பிற்படுத்தப்பட்ட மக்களிடம் விற்று, அவர்களை வெறியேற்றி அந்த நெருப்பில் குளிர்காய்ந்து கொண்டே புரட்சி செய்வதாக இத்தனை நாள் பொழப்பை ஒட்டி கொண்டிருப்பதற்காக இந்த விருது வழங்கப்படுகிறது. 

உங்களுக்கு பிடிச்சிருந்தா ஓட்டு போடுங்க...

உங்க கருத்துக்களை இங்கே பதிவு பண்ணுங்க...